أوبريت فى حبك يا مصر
فى حبك الليل ونيسى
ِ
و الشوق جليسى
و مشروبى الدافى ذكرياتى
فى حبك
القلب عاش
و فى بعدك القلب مات
وازاى يعيش وانت الروح
فى حبك
الدنيا بما فيها جنة
يومها نور وليلها قمر يجمعنا
ونار عذابك تطفيها دموعنا
وآهـ يا زمن من غدر الصحاب
وآهـ وآهـ يا زمن من غدر الأحباب
وألف آهـ وآهـ من غدرك يا زمن
و تاه الطريق
والخطوة وخدانا فوق الحريق
ثورة مخطوفة
وثورة محفوفة بالأعداء
بنكبش وندى والعمر بيعدى
ومفيش صدق ولا أصدقاء
فى دنيا دوارة
طحونة جبارة ..
بتطحن حجارة
الشقى ويا البرئ
سفينة تايهة
والبحر موجه عالى
والكل فيها ضايع
والمفقود غريق
بر الأمان قريب
تعمى البصيرة
نشوفه بعيد
الركاب الجوع ياكلهم
يمدوا الأيادى
قانون البحر غالب
يصيدوا بعضهم صيد
وع البر قانون الغابة
التعلب تاكله الديابه
الفساد بجذوره ضارب
و السجن بوابته حديد
نطلع نشوف قانون الطير
الصقر ياكل الحمايم
و يصيد من الارض الأرانب
والنسر ملك الطيور
فى كل اتجاه معارك
مين يحارب ومين يشارك
الطمع فى الغنيمة
ومش كل من ركب الحصان خيال
كل ده والأنسان مبقاش إنسان
فى بلادنا العربية
عايشن أوهام بين الظلم والحرية
وقوانين رايحة ... وقوانين جاية
العين على الكرسى
أمير وجماعة إرهابية
وربنا بيتاجروا بدينه
و دى جماعة ليبرالية عايزاه
لا تفهم فى الحكم و لا عرفاه
اللى يقول شعار احنا وراه
من غير ما الكل يفهم معناه
سبوبه و سقيفة
وجيوبهم نضيفه
وعقولهم أنضف
من النضافة
رجال الدولة مهماش هتيفه
دا علم غالى برتكول فى العلالى
ومش أى حد يتولاهـ
سياسة واقتصاد .. وعلوم عسكرية
رعاية اجتماعية وإيمان بالبلاد
غريزة وطنية من رب العباد
واللى ربى خير من اللى اشترى
وياما الشطط ضيع بلاد
وياما الجهل ضيع كنوز
محامى وشاطر فى مهنته
رفع دعوى يبطل تعاقد
حيتان الفساد عملته
حكم له قاضى أشطر وخد بحجته
الاتنين ضيعوا الحق من أصول العقد
وجابوا علينا الحق
من غير ما يقصدوا
العبارة مش كتاب وقانون وشطارة
العبرة على مفهومية الرجالة
هل يقدروا يشوفوا البعيد
من غير مستشار أو عراف أو نظارة
يعرفوا الوجوه اللى لبسه وشوش
ويقلعوهم بجدارة
ويبوسوا الأيادى الشغالة
فى الغيط والمصنع بتعبى شكارة
منها ناكل وبيها نبنى وسلاحنا فى أدينا
عدو الداخل خاين غريب
والعدو الأصلى
حاطط عينوا علينا
يدى اللى بينا سلاح
ولما نتحارب
نلاقيه فى وسطينا
قال أيه جاى يصالحنا
ومن بعض يحمينا
وضيع منا البلد والعمى يجينا
نزرع ونصنع
ونسلم للعدو خيرنا بإدينا
ويبقى الكل عبيد زينا زى بعضينا
صورة مخيفة وكابوس
واللى يضرنا منعملوش
ولا تقولى لا ربيع ولا خريف
ومحدش فى النخبة حربف
لو فيكم مكنش الشارع
وقت الأزمة سبق خطاويكم
للحكم رجال والحمل جبال
ومصر ولادة
من بين ولادها تلاقى
بالفطرة و لدت قادة
بحبها مفتونين
وعلى أمنها سهرانين
وفى سبيلها مضحيين
هما دول الرجالة والقادة
